2 நாளாகமம் 24 : 1 (RCTA)
யோவாஸ் அரசானான போது அவன் ஏழு வயதுள்ளவனாக இருந்தான். அவன் யெருசலேமில் நாற்பது ஆண்டுகள் அரசாண்டான். அவனுடைய தாயின் பெயர் சேபியா. அவள் பெர்சபே என்ற ஊரில் பிறந்தவள்.
2 நாளாகமம் 24 : 2 (RCTA)
குரு யோயியாதாவின் வாழ்நாள் முழுவதும் யோவாஸ் ஆண்டவர் திருமுன் நேர்மையாக நடந்து வந்தான்.
2 நாளாகமம் 24 : 3 (RCTA)
யோயியாதா அவனுக்கு இரண்டு பெண்களை மணமுடித்துக் கொடுத்தார். அவர்களால் யோவாஸ் புதல்வர்களையும் புதல்வியரையும் பெற்றான்.
2 நாளாகமம் 24 : 4 (RCTA)
ஆண்டவரின் ஆலயத்தைச் செப்பனிட யோவாஸ் தீர்மானித்தான்.
2 நாளாகமம் 24 : 5 (RCTA)
எனவே, குருக்களையும் லேவியர்களையும் கூடிவரச்செய்து அவர்களைப் பார்த்து, "நீங்கள் புறப்பட்டு யூதா நகர்களுக்கெல்லாம் போய் உங்கள் ஆண்டவரின் ஆலயத்தை ஆண்டு தோறும் பழுதுபார்க்க இஸ்ராயேலெங்கும் பணம் சேகரியுங்கள்" என்றான். லேவியர்கள் இது மட்டில் அசட்டையாய் இருந்ததைக் கண்டு,
2 நாளாகமம் 24 : 6 (RCTA)
அரசன் பெரிய குரு யோயியாதாவை அழைத்து, "ஆண்டவரின் அடியானான மோயீசன் சாட்சியக் கூடாரத் திருப்பணிக்காக இஸ்ராயேல் மக்கள் எல்லாருமே வரி கொடுக்க வேண்டும் என்று கட்டளையிட்டார். லேவியரோ அவ்வரிப் பணத்தை யூதாவிலும் யெருசலேமிலும் வசூலிக்காது இருக்கின்றனர். இதை அறிந்தும் நீர் ஏன் அவர்களைக் கட்டாயப்படுத்தாது இருக்கிறீர்?
2 நாளாகமம் 24 : 7 (RCTA)
அந்தப் பழிகாரி அத்தாலியாவும் அவளுடைய புதல்வரும் கடவுளின் ஆலயத்தை அழித்து, ஆண்டவரின் ஆலயத்தில் அர்ப்பணிக்கப்பட்ட பொருட்களையெல்லாம் கொள்ளையிட்டு அதைக் கொண்டு பாவாலின் கோவில்களை அழகுபடுத்தி விட்டனரே!" என்றான்.
2 நாளாகமம் 24 : 8 (RCTA)
அப்பொழுது அரசனின் கட்டளைப்படியே ஒரு பெட்டியைச் செய்து அதை ஆண்டவரது ஆலய வாயிலுக்கு வெளியே வைத்தனர்.
2 நாளாகமம் 24 : 9 (RCTA)
கடவுளின் அடியான் மோயீசன் பாலைவனத்தில் இஸ்ராயேலுக்குச் செலுத்த வேண்டும்" என்று யூதாவிலும் யெருசலேமிலும் பறையறைந்தனர்.
2 நாளாகமம் 24 : 10 (RCTA)
இதைக் கண்டு எல்லாத் தலைவர்களும் மக்களும் மகிழ்ச்சியுற்றனர். அவர்கள் வரிப்பணத்தை ஏராளமாகக் கொண்டு வந்ததனால் அப்பெட்டி நிறைந்து போயிற்று.
2 நாளாகமம் 24 : 11 (RCTA)
நிறையப் பணம் இருக்கிறதென்று கண்டால் லேவியர்கள் அப்பெட்டியை அரசனிடம் கையோடு கொண்டு வருவார்கள். அப்பொழுது அரசனின் செயலனும் பெரிய குருவால் நியமிக்கப்பட்ட அலுவலனும் வந்து, பெட்டியிலிருக்கும் பணத்தைக் கொட்டி எடுத்த பின் அதைத் திரும்ப அதன் பழைய இடத்திலேயே வைத்து விட்டுப் போவார்கள். இவ்வாறு நாள்தோறும் செய்து ஏராளமான பணம் திரட்டினார்கள்.
2 நாளாகமம் 24 : 12 (RCTA)
அதை அரசனும் யோயியாதாவும் ஆண்டவரின் ஆலய வேலையைக் கவனித்து வந்த ஊழியரின் கையிலே கொடுத்தார்கள். அதைக்கொண்டு அவர்கள் ஆண்டவரின் ஆலயத்தைப் பழுதுபார்க்க கொத்தர்களையும் தச்சர்களையும் கூலிக்கு அமர்த்தினார்கள். இரும்பு, வெண்கல வேலையில் கைதேர்ந்த தட்டர்களும் ஆலய வேலைக்கென அமர்த்தப்பட்டனர்.
2 நாளாகமம் 24 : 13 (RCTA)
இவ்வாறு அவர்கள் தத்தம் வேலையைக் கவனமுடன் செய்து வந்தனர். சுவர்களைச் செப்பனிட்டுக் கடவுளின் ஆலயத்தைப் பலப்படுத்தி அதை பழைய நிலைக்குக் கொண்டு வந்தனர்.
2 நாளாகமம் 24 : 14 (RCTA)
வேலைகள் எல்லாம் முடிந்த பின் எஞ்சிய பணத்தை அரசனுக்கும் யோயியாதாவுக்கும் முன்பாகக் கொண்டு வந்தனர். அவர்கள் அதைக்கொண்டு ஆண்டவரின் ஆலயத்தில் செய்யப்படும் தகனப்பலி முதலிய வழிபாட்டுச் சடங்குகளுக்கு வேண்டிய தட்டுமுட்டுகளையும் கலயங்களையும், பொன், வெள்ளிப் பாத்திரங்களையும் செய்தனர். யோயியாதாவின் வாழ்நாள் முழுவதும் ஆண்டவரின் ஆலயத்தில் தகனப் பலிகள் செலுத்தப்பட்டு வந்தன.
2 நாளாகமம் 24 : 15 (RCTA)
யோயியாதா வயது முதிர்ந்த கிழவரானார். அவர் இறந்த போது அவருக்கு வயது நூற்று முப்பது.
2 நாளாகமம் 24 : 16 (RCTA)
அவர் இஸ்ராயேலுக்கும் அரண்மனைக்கும் நன்மை செய்திருந்ததனால் மக்கள் தாவீதின் நகரில் அரசர்களுக்கு அருகே அவரை அடக்கம் செய்தார்கள்.
2 நாளாகமம் 24 : 17 (RCTA)
யோயயியாதா இறந்தபின் யூதாவின் தலைவர்கள் வந்து அரசனுக்கு மரியாதை செலுத்தினர். அப்பொழுது அரசன் அவர்களின் உபசார மிகுதியினால் மயங்கி அவர்களது விருப்பப்படி நடக்கத் தொடங்கினான்.
2 நாளாகமம் 24 : 18 (RCTA)
யூதா மக்கள் தங்கள் முன்னோரின் கடவுளாகிய ஆண்டவரின் ஆலயத்தைப் புறக்கணித்து விட்டுச் சிலைத்தோப்புகளை அமைத்துச் சிலைகளையும் வழிபடத் தொடங்கினர். அவர்கள் செய்த இப்பாவத்தின் பொருட்டு யூதாவின் மேலும் யெருசலேமின் மேலும் கடவுள் கடுங்கோபம் கொண்டார்.
2 நாளாகமம் 24 : 19 (RCTA)
அவர்கள் மனந்திரும்பித் தம்மிடம் திரும்பவும் வரும்படியாக ஆண்டவர் அவர்களிடம் இறைவாக்கினரை அனுப்பினார். ஆயினும் மக்கள் இவர்களின் குரல்களுக்குச் செவிமடுக்கவே இல்லை.
2 நாளாகமம் 24 : 20 (RCTA)
ஆகவே ஆண்டவரின் ஆவி குரு யோயியாதாவின் மகன் சக்கரியாசின் மேல் இறங்கினது. இவர் மக்களுக்கு முன் நின்று அவர்களை நோக்கி, "கடவுளாகிய ஆண்டவர் சொல்லுகிறதாவது: 'நீங்கள் ஆண்டவரின் கற்பனைகளை மீறுவது ஏன்? அதனால் உங்களுக்கு நன்மை ஒன்றும் வராது. நீங்கள் ஆண்டவரைப் புறக்கணித்ததால் ஆண்டவரும் உங்களைப் புறக்கணிப்பார்' என்பதாம்" என்றார்.
2 நாளாகமம் 24 : 21 (RCTA)
இதைக் கேட்டு மக்கள் அவருக்கு எதிராய்ச் சதிசெய்து அரசனின் கட்டளைப்படி ஆண்டவரின் ஆலய முற்றத்தில் அவரைக் கல்லால் எறிந்தனர்.
2 நாளாகமம் 24 : 22 (RCTA)
இவ்வாறு செய்நன்றி கொன்றவனாய் யோவாஸ் யோயியாதாவினுடைய மகனைக் கொலை செய்தான். இவர், "ஆண்டவர் இதைப் பார்க்கிறார்; அதற்குப் பழிவாங்குவார்" என்று சொல்லி கொண்டே உயிர்விட்டார்.
2 நாளாகமம் 24 : 23 (RCTA)
அடுத்த ஆண்டு சீரியர் அவனுக்கு எதிராகப் படையெடுத்து வந்து, யூதாவிலும் யெருசலேமிலும் புகுந்து மக்களின் எல்லாத் தலைவர்களையும் கொன்று குவித்தனர்; கொள்ளையிட்ட அவர்களின் உடைமைகளை எல்லாம் தமாஸ்குவில் இருந்த தங்கள் அரசனுக்கு அனுப்பி வைத்தனர்.
2 நாளாகமம் 24 : 24 (RCTA)
சீரியர் படை சிறியதே எனினும் யூதா மக்கள் தங்கள் முன்னோரின் கடவுளாகிய ஆண்டவரைப் புறக்கணித்திருந்ததால் ஆண்டவர் அவர்களது பெரும் படையைச் சீரியர் கையில் ஒப்படைத்தார்; யோவாசை கொடூரமாகத் தண்டித்தார்.
2 நாளாகமம் 24 : 25 (RCTA)
கடும் நோயுற்ற நிலையில் சீரியர் யோவாசை விட்டுச் சென்றனர். குரு யோயியாதாவின் மகனின் இரத்தப்பழியின் பொருட்டு அவனுடைய ஊழியர்கள் அவனுக்கு எதிராகச் சதி செய்து படுக்கையிலேயே அவனைக் கொன்று போட்டனர். யோவாஸ் தாவீதின் நகரில் அடக்கம் செய்யப்பட்டான். ஆயினும் அரசர்களின் கல்லறையிலே அவன் வைக்கப்படவில்லை.
2 நாளாகமம் 24 : 26 (RCTA)
அவனுக்கு எதிராக சதி செய்தவர்கள் அம்மோனியனான செம்மாகாத்தின் மகன் ஜாபாத்தும், மோவாபியப் பெண் சேமரீத்தின் மகன் யோசபாத்துமேயாம்.
2 நாளாகமம் 24 : 27 (RCTA)
யோவாசின் புதல்வரைப் பற்றியும், அவன் திரட்டிய பணத்தொகையைப் பற்றியும், கடவுளின் ஆலயச் சீரமைப்புப் பற்றியும் அரசர்களின் வரலாற்றில் விரிவாய் எழுதப்பட்டிருக்கிறது. அவனுடைய மகன் அமாசியாஸ் அவனுக்குப்பின் அரியணை ஏறினான்.
❮
❯